ឯកឧត្តមបណ្ឌិត ហែម ប្រសើរ និយាយថា ខ្ញុំពិតជាមានសេចក្តីសោមនស្សរីករាយជាពន់ពេក ក្នុងព្រឹត្តិការណ៍ដ៏ មហាសែនរីករាយនៃថ្ងៃបុណ្យឆ្លងឆ្នាំសកលដាច់ឆ្នាំចាស់ផ្លាស់ឆ្នាំថ្មី២០២៥ ដែលទឹកដីកម្ពុជាជាពិសេសគឺទីក្រុង បានផ្តល់នូវភាពរំភើបរីករាយជូនប្រជាពលរដ្ឋដែលមិននឹងស្មានដល់ ។

តាមព័ត៌មានពីបណ្តាញសង្គមជាច្រើនបានឲ្យដឹងថា ព្រឹត្តិការណ៍សាទរកម្ពុជា ឬ (Celebrating Cambodia) និងពិធី ឆ្លងឆ្នាំសាកល ២០២៤ -កាលពីថ្ងៃទី ៣១ធ្នូ រហូតចូលម៉ោង ០០.០០ នាទី ឈានចូលឆ្នាំ ២០២៥ ដែលរៀបចំឡើង ដោយសសយក និងសាលារាជធានីភ្នំពេញនៅសួនច្បារ មុខព្រះបរមរាជវាំង ទទួលបានភ្ញៀវទេសចរជាតិ និងអន្តរ ជាតិ ជាង១លាន ៥សែននាក់ មកទស្សនា។

ស្ថិតនៅក្រោមរូបភាពនៃស្នាមញញឹមនិងភាពរំភើប ក្នុងនោះក៏មានការដាក់តាំងបង្ហាញអំពីក្បូរក្បាច់រចនា អត្តសញ្ញាណសីល្ប:ប្រពៃណជាតិ ដាក់បង្ហាញដល់មហាជនទស្សនានៅតាមសួន និងដង្ហែរតាមទីសាធារណ: ជាច្រើនផងដែរ លើសពីនេះក៏មានការបាញ់កាំជ្រួចបង្ហាញទស្សនីយភាពដ៏ប្លែកជូនមហាជនបានកំសាន្តទស្សនា ទៀតផង ។

ឯកឧត្តមបណ្ឌិតបញ្ជាក់ថា ទាំងអស់នេះគឺជាសក្ខីភាពមួយបញ្ជាក់យ៉ាងច្បាស់ថា ប្រទេសកម្ពុជា គឺជាប្រទេស ដែលមានសន្តិភាព សេរីភាព និងការគោរពសិទ្ធិគ្នាទៅវិញទៅមកខ្ពស់ ជាពិសេសអ្វីដែលគួរកត់សំគាល់ទៀតនោះ ប្រជាជាតិកម្ពុជាគឺជាអ្នកដែលមានសណ្តានចិត្តល្អពោពេញដោយក្តីស្រឡាញ់ មិនមានការរើសអើងពូជសាស្ត្រ ពណ៍សំម្បុរណាមួយឡើយ ដូច្នេះយើងទាំងអស់គ្នាត្រូវតាំងចិត្តថា យើងរួមគ្នាថែរក្សាការពារសន្តិភាពមួយនេះឲ្យ កាន់តែយូរអង្វែងបន្តទៀត សម្រាប់កូនសម្រាប់ចៅយើងទាំងអស់គ្នា ៕